Et consultato quid fiendum, et dimandato l'opinione nostra, io li fu contrario nulla li fusse dato, et questo per seguir la leze, et cussì tutto el collegio vene in mia opiniom.
     
      Et li consejeri andono a incantar le galie tre di Alexandria a Rialto, et questi patroni medemi le fono tuor a tre soi amici: sier Marco Querini q. sier Jacomo per il Polani, sier Priamo Contarini q. sier Zuane per il Guoro, et sier Silvestro da Leze q. sier Jacomo per il Calbo, zoè per quelli precii medemi che lhoro primi patroni le tolseno.
     
      Et li savii rimaseno in collegio a consultar la materia di mandar le galie grosse in armada, justa la parte misi in pregadi.
     
      Et fo aldito prima tra li consejeri et collegio una diferentia di certa piera, zoè sier Francesco Zustignam patrom a l'arsenal come procurator dei frati di San Francesco di frari menori, et sier Francesco Foscari per San Marco.
     
      Da poi disnar fo consejo di X con zonta di collegio.
     
     
      [1499 06 08]A dì 8 zugno. Non fo il principe in collegio, et fo gran confusion. Lete le lettere, li savii andono in camera a consultar, et la Signoria rimase a dar audientia; et fono prima alditi li patroni di Alexandria cazuti, quali si oferisseno andar in armada; poi fu aldito sier Trojan Bolani, sier Jacomo Corner da Baruto, et do di Fiandra.
     
      Da Ferrara del vice domino, di 6. Come a Milan era andato uno orator dil re di romani a dimandarli ajuto contra sguizari, et ducati 50 milia; et il ducha li ha promessi di darli, et che ditto ducha è gajardo, et pocho si cura di Franza, dice haver il re di romani et il re di Napoli con lui, et fiorentini, quali perhò par non si habino risolto ancora, et dice [798] il Turcho darà fastidio a la Signoria nostra.