Et che a Duin è uno altro capitano regio chiamato misier Scipiom, et lui non se impaza.
     
      Or in collegio molti volea scriver rendesse dette cavalle, per non venir a remor con chi fortasse causam querit, et sier Filippo Trum procurator non volse, fo gran disputation, tamen nihil conclusum.
     
      Da Palermo, di sier Lorenzo Miani consolo, di 22 mazo. Come le galie di Fiandra, capitano sier Nicolò Capelo, zonse lì, volse haver salvoconduto per la nave presa per esso capitano a l'andar dal viceré, e non lo potè haver, e andono a Messina; et che li patroni facevano ben e guadagnerano assai. Item, havia formento. Recevuto nostre lettere zercha la nave Donada qual fu presa, e dice quella si vende, il corpo di la nave, et il viceré non fa provision alcuna che la se rehabi, come fè etiam di la nave di sier Andrea Badoer, et ha protestato; et come havia tutte le scriture in hordine.
     
      Intrò li cai di X, e mandati tutti fuora, da poi disnar fo consejo di X con gran zonta, et a Rialto intisi che l'altro dì in consejo di X, a requisition di cai di creditori, atento li Lipomani non voleno mostrar li libri etc., che manchò una balota non fusse tajà il salvoconduto have per uno anno; et etiam fo voluto tajar quel dil banco di Garzoni.
     
     
      [1499 06 12]A dì 12 zugno. In collegio. Non fo il principe. Vene sier Hironimo Zorzi el cavalier e sier Nicolò Micolò Michiel doctor e cavalier, stati oratori in Franza, quali in execution di comandamenti factoli, portano li arzenti li dete il re di Franza, zoè 6 taze coperte grande d'arzento per uno, uno bocal schieto per uno, do poti et do fiaschi con cadene d'arzento per uno, tamen variadi; et il Zorzi disse alcune parole come non meritavano questo, avendosi cussì ben portato in quella legation; et sier Filippo Trum procurator disse: abiè pacentia; e fo terminato [808] mandarle a l'oficio de le raxon nove, e non debino far altro fino non li sarà ordinato per il collegio; et fo parlato di tenirli in le procuratie per memoria, come a la fin fono posti.