Fu fato le parole per nome di la majestà regia, per misier Polo Lectistener, et nel principio per captar benivolentia disse: che l'era stà divulgato che la sua majestà era morta, et che quella si havia voluto venir a dimostrar, et voleva viver e morir con lhoro, et per niun modo li voleva abandonar, con altre simile atractive parole rengraciandoli de la fede gli haveano dimostrato. Fo rechiesto poi, pur per nome di la presente soa majestà, che ancor che in altri tempi a simili bisogni el paese havia dato a suo spexe homini 9000, al presente solamente ne dimandava per mexi tre ne desseno 8000, de li quali soa majestà né voleva fosseno pagati per il paese, né volea da lhoro la zente, ma li danari per dicto numero, volendo sua majestà quelli spender in homeni experti al fato di le arme. Et fo fato contention, parte consentendo e parte il contrario, e in quel zorno non fu concluso altro. La domenica sua majestà fu a messa, et in quel zorno fu ritornato a la Dieta, ne la qual soa majestà non si atrovò, et in essa seguite uno grande disordine e forno per esser a le arme quelli dil paese con li zentilhomeni: la causa fu che, parlando uno da Bolzam, per nome de li paesani, per uno zentilhomo fratello dil capitano dil paese, fu mentito per la gola in modo che se solevono tutti li paesani contra de lui, [831] al qual con gran faticha fu reparato; et s'el non fusse stà usato parole per nome di la regia majestà, per le quale a quelli fu dechiarato che essa regia majestà havea saputo quelli che erano stati colpevoli de li erori per avanti comessi, et che a un tempo sua majestà li daria la punition li meritava, in ogni modo saria seguito qualche inconveniente; ma con quel mezo fu quietato la furia de' villani.