Da poi fu concluso et asentito a la richiesta regia, di darli li danari per li 4000 fanti, per do mexi solamente, et furono electi 12 homeni, 4 prelati, 4 zentilhomeni et 4 per quelli dil paese a far la partition, et haveano dechiarito che li prelati et zentilhomeni ne pagasseno 1750, et 2250 ne pagasseno quelli dil paese; et su questa dichiaration ne era stà molta discordia, né per cossa alcuna i paesani voleano assentir; et fino al partir di esso, che referisse, che fo il luni a dì 10 a hore 18, fin quel hora non si havia sentito come se habino adaptati. Item, la majestà regia era lì, et con non molta reputatione havea seco da stafieri 10 con le pestarole ruzene, et quello haveano atorno non valea fra tutti lhoro fiorini 6; et divulgavase esso re lassato hordine de lì anderia e Felchirch. Item, si trovava a Meram molti soldati di ventura, quali non haveano voluto tuor stipendio, i quali forno tolti suspeti, et fo fato per la majestà regia, che soto pena di la forcha, fra termene de' zorni do, se dovesseno partir de lì, i quali partiti devano causa che le strade erano mal segure.
     
      Da Vicenza, di sier Domenico Contarini capitano. Di certo gran caso seguito di uno Zuam Hironimo di Loschi citadin, qual à bastonà uno, et sodomitava un puto etc. Vol taja darli etc.
     
      Da Padoa, di sier Marco Bolani, podestà. Di certo caso intervenuto per el simel, dimanda auctorità di dar taja.
     
      In questa matina fo iterum balotà sier Bortolo Lion conditor dil dacio di le do e tre per 100, et cossì rimase tutti i piezi.