Da Brexa, di sier Polo Trivixan el cavalier podestà et dil capitano, di 18. Mandano avisi abuti di Valchamonicha, scriti per quel Jacomo di Gavardo, qual mandono a Breno: come todeschi in l'Agnelina alta havia brusato Sozo, terra dove stava justicia, et 26 ville, zoè caxe di legno, et fato danno di ducati 2000; et il re di romani ste solum do zorni lì, et è partito, va a Felchirch contra sguizari. Item a Tirano in Valtelina, loco dil ducha di Milan, è assai farine, vituarie, munition zercha 40 cara, per la venuta dil ducha di Milan, et a Bormio è misier Baldisera da Pusterla et misier Galateo et misier Tomaso Brascha et uno altro, zoè 4 comessarii. Insieme col re di romani i tre oratori, zoè misier Gualtier Fontecha orator di Spagna, misier Francesco de Montibus orator di Napoli, misier Marchexin Stanga orator di Milan, si aspeta uno orator dil Turcho, el qual re à dimandato a la Dieta, etc. Et vol esso re andar in la val di Poschiavo a danno de l'Agnelina bassa che finora non ha abuto alcun danno. Item, che la liga dil Bo con le tre lighe erano unite, et voleno far fati; et che il re a la Dieta a Meran havia otenuto haver danari per pagar le zente et harà ducati 1500, et la election di 12 ut patet.
     
      Da Mantoa di uno Francesco Dolze. Nara di quel marchexe, scritta a dì 18, la qual per esser drizata a li cai di X non fu leta.
     
      In questa matina per collegio fu mandato uno comandamento a la doana dovesseno discargar le galie venute di Fiandra si di festa come de dì di lavorar, perché voleamo mandarle via.