Da Bassan, di sier Alvise Lion podestà et capitano, di 21. Havia ricevuto lettere di la Signoria nostra con li cai di X, che 'l castelan di la Scala debi star serado lì: à fato il comandamento. Item, esser venuto l'inzegner di Friul lì, li mostrerà la forteza di la Scala, etc.
     
      Ha di novo, il re di romani partì da Meram venere per andar a una bastìa, tolse a' agnelini, overo a Felchrich a l'altro suo campo; et che a Trento, Ivam et Borgo si fortificava; et che in campo si crida Italia, Italia. Et manda una lettera di quel zorno, abuta di Piero de Stechim castelam al Covolo: come il re era partido da Meram, et in Valdinosta esser stà roti todeschi 2000 da' agnelini, et esser con agnelini la liga dil Bo, et la liga Grisa, in tutto da 80 milia persone, vanno in Valvenosa; et à mandato a disfidar il re di romani a la pugna el dì di San Zuane; siché tutto quel paese longo l'Adige è in teror.
     
      Da Bergamo, di sier Hironimo Orio podestà, et sier Francesco Baxadona capitano, di 20. In risposta di nostre lettere zercha il star vigilanti a li confini dil re di romani, dice confinar solum con la Valtelina ch'è dil ducha di Milan, et di là è dei todeschi, et che 'l ducha fè una crida che tutti senza pagar dacio portasseno vituarie in Valtelina, et devedò vituarie non andasse a' agnelini; et il re di romani è per venir lì con zente dil vescovo di Cuora, dil Vescovo di Trento et di quel di Brexanon.
     
      In questa matina fo parlato di far far oration, et dar farine a più monestieri per elemosina, acciò pregino Dio.