Da Cataro, di sier Alvise Sagudino, secretario, di 9, etiam di sier Francesco Querini provedador, di 9. In conformità. Come haveano mandato a Ragusi, et scrive le parole dil Gondola; et haver auto lettere da Ferisbei, qual è a Filipopuli, e dice manda uno suo messo, per saper a che era venuto esso secretario nostro. Item, ha nova che re di Hungaria, zoè lì baroni erano sublevadi contra esso re, perché el meteva imposition a li populi, dicendo voler far guerra ai Turchi, e poi nulla facea.
     
      Item, el provedador scrive, di 8, che il podestà di Antivari li havia scritto che l'armata era ussita e andata a Tenedo, et il signor a dì 19 mazo, dovea partirsi da Constantinopoli per la Natolia, e va a Rhodi, farà zornate 15. Item, il vajvoda di Montenegro, esser stato lì a Cataro, li ha dito haver hordine da Ferisbei di ben convincinar con la Signoria, li ha fato bona compagnia, etc. Siché de lì intorno, sta in bona paxe con tutti. Item, ha, che 'l Signor mena con si a Rhodi maistri de minere, per far caviculi soto terra. Item, esso provedador havia speso ducati 20 dil suo, in le fabriche: pregava la Signoria li mandi, non li pol trar di la camera per esser povera. Item, la galia, si arma de lì, non esser ancor zonta, l'aspeta.
     
      Da Palermo, di sier Lorenzo Miani consolo, di 5 zugno. In materia de li biscoti, per il mercado fato de lì havia mandato cantera 300, zoè stera 600, su una nave a Corphù a obedientia dil zeneral.
     
      Fo dito come in questi zorni tempestò in Botenigo si forte, e fu cussì grande che amazò do homeni.