Di Piero Brazadelo, fo leto una lettera scrita a la Signoria nostra a Rovere di Mantova, a dì 24. Come era venuto lì al marchexe uno orator dil re di Franza, con uno altro monsignor, vien a la Signoria nostra; et il Signor li ha honorati, li andò contra, alozono in castello, stete in coloquio insieme, quali vieneno tutti do alla Signoria, et zà erano partiti, avisava, etc.
     
      Et fo tolto il scrutinio di 4 savii dil consejo, in luogo di sier Fedrigo Corner procurator, sier Constantin di Prioli et sier Marchio Trivixan compieno, et di sier Antonio Grimani procurator, è andato capitano zeneral, qual il quarto sia per tre mexi; et rimase: primo sier Lunardo Loredam provedador qual statim remase, introe sier Alvixe Bragadim procurator, qual non introe sier Marco Antonio Morexini el cavalier fo consejer, perhò che refudoe consejer, et sier Domenego Marin fo capitano a Padoa per tre mexi, fu soto sier Marin Liom fo capitano a Padoa. Item, fono electi tre savi di terra ferma, in luogo di sier Alvixe Venier compie, sier Polo Pixani el cavalier, et sier Marco Sanudo, sono intradi avogadori di comun: rimase sier Domenego Trivixan el cavalier qual refudò, sier Alvixe da Molin fo savio a terra ferma qual tolse rispeto, poi la matina introe, et sier Beneto Zustignam fo savio a terra ferma, qual introe: cazete con titolo, sier Andrea Zanchani, sier Antonio Calbo, sier Lunardo Grimani, sier Piero Duodo, et altri poi senza titolo molti.
     
      Fu posto, per sier Marchio Trivixan savio dil consejo, che atento el bisogno si havia di expedir presto l'armada, che li balestrieri fati eri di le galie di Fiandra siano ben electi; et andoe in renga, et parlò dicendo li savii ai ordeni li haveano fati di hordine dil collegio.