A l'incontro sier Zuam Corner, sier Jacomo Marzelo, sier Filippo Minio cai di XL, messeno che ditta election debbi andar zoso, atento era fata contra la forma di le leze; et andò le parte 29 dil Trivixan, 100 di cai di XL, et fu preso si dovesse far le election di novo.
     
      Item, fu messo, per li savii dil consejo et di terra ferma, et fo opinion di sier Francesco Trum, di elexer do provedadori executori di le deliberation [853] dil consejo di pregadi, per le cosse di mar, quali siano electi dil corpo dil consejo di pregadi non posendo esser electi niun dil collegio; et con quella autorità fono electi, sier Alvixe Querini et compagni a tempo di la guera di Ferrara; et parendone per questa parte alquanto fusse denigrato l'autorità di l'oficio di savii ai ordeni, andai in renga dimostrando ai pregadi le operation di savii ai ordeni, et non si dovea per el merito nostro far questo, et a l'incontro insieme con li compagni missi che, atento le cosse di mar siano per leze comesse ai savii ai ordeni, che da mo sia preso: che le execution ditte siano comesse a li savii ai ordeni, et i provedadori sora l'armar presente et futuri con quella autorità etc. Mi rispose sier Leopoldo Loredan procurator, qual in quella hora era intrato savio dil consejo, laudandome, et che non si feva per tuorghe l'honor ma per exeguir, et che non potevamo star in collegio et armar galie etc. Poi li rispose sier Polo Barbo el consejer, laudandone summamente, dicendo signori, tutto è fato, questi savii ai ordeni à expedì le galie, non resta altro, si avè boni factori non li mudè, etc.