Lo à rimandato e dice aviserà altro. Et è da saper, fo terminato, nel consejo di X, di mandarli prè Martin Albanese arzivescovo di Durazo, el qual è ben voluto in quelle parte et à gran seguito, et si li dà ducati 50; et etiam, per el consejo di X, si manda al ditto provedador ducati 50.
     
      In questo zorno in pregadi non fo il principe. Et fu messo parte, per i savii dil consejo, terra ferma e ordini, et sier Polo Barbo el consejer: di scriver al capitano zeneral una lettera di la iruption fata per Scander bassà a Zara, et che havendo roto esso Turcho in levante, esso capitano debbi mandar a dimandar l'armada al gran maistro di Rhodi, et prometi et dagi danari a ditta armada, venendo in ajuto nostro; et avisarlo di le provision femo, e di l'armada si fa in Provenza di 10 barze, 3 galeaze et 4 galie, et mandarli alcuni avisi abuti da Constantinopoli. Ma sier Polo Barbo e nui savii ai ordeni, volevamo continuar in ditta lettera, che non ussendo over ussendo l'armata a' nostri danni, e andando a danni di altri, esso capitano dovesse mandar uno homo praticho al Turcho a dirli il danno ne era stà fato a Zara, et che provedi a la indenità nostra, per non creder, la Signoria nostra, ditta incursion sia stà fata di mente soa. Et parlò sier Polo Barbo in favor di la sua e nostra opinion; li rispose sier Nicolò Foscarini, savio dil consejo, dicendo esser parole minatorie, et non dovemo comenzar a iritar il Turcho, etc. Et cussì nui savii ai ordeni si tolessemo zoso di ditta zonta, et restassemo su la prima nostra opinion et sier Gasparo Malipiero andò in renga, e aricordò quelle parole di avisi abuti da Constantinopoli si scriva in zifra, per il pericolo di merchadanti nostri sono lì; et cussì si farà. Andò le parte, una non sincera, 5 di no, dil Barbo fo 92, di altri savii 104, e fu presa.