Item, che di la provision dil signor suo havesse ogni tre mexi la rata, ch'è ducati 3000. Risposto si consejeria: et la prima li fu fatta.
     
      Venendo oratori di la comunità di Verona misier Andrea di Pelegrin dotor et misier Ogniben di Bra, exponendo per nome di quella fidelissima comunità: che havendo nel suo consejo posto parte le done non portaseno più veste d'oro nì de arzento nì vesture, era stà messo certe polize publice che diceva mal dil consejo, et mostrono una poliza in la qual si conferiva bechi fotui non vardè a tutto, et poi contra quel Justo de Justi, che suo padre fo impichà, et lui sarà, et altre simile ignominiose parole. Pertanto richiedono sia mandato lì uno cao dil consejo di X, over avogador a far inquisition, et punir chi se troverà sarà stato. Et andati fuora, sier Filippo Trum procurator parlò contra di certo edito fato lì di quelli andavano al presente, da poi fato la liga, con abiti francesi, ergo etc., tandem fo terminato mandarli uno avogador suso, et cussì d'acordo andoe sier Nicolò Michiel dotor et cavalier.
     
      Vene sier Alvixe Contarini q. sier Ferigo, dicendo esser stà retenuti di uno gripo a Zara certi turchi merchadanti quali andavano a Ragusi; pertando, pregava la Signoria li fazi restituir, acciò el Signor non fazi retenir i nostri merchadanti sono a Constantinopoli et altrove, atento mai per guerra el Turcho habi tenuto nostri merchadanti; et fo risposto si vederia.
     
      Da Feltre, di sier Mathio Barbaro podestà et capitano, di ultimo zugno. Come havia che misier [869] Zorzi di Petra Plana, hessendo a uno loco volendo cenar, li vene una lettera, et subito leta montò a cavallo, et nulla disse, andò a Trento.