Item, di lì via per tutto erano in fuga, sona campana martello per dubito di agnelini. Item, esser ritornato uno suo explorador, mandò a Bolzam, et dice come fo mia 17 lontan di Feltre, trovò tre venivano di campo, et li disse esser stati a le man con sguizari, et esser morti da 13 in 14 milia la più parte todeschi, et il re haver fato trieva per zorni 13. Item, esso podestà haver chavalchato a do valle nostre sotto el suo teritorio, zoè in la val de Menam, et in la val de Arsi dove per inondation de aque venute dai monti, è stà gran pecato, havia butà giara et legni et ruinado le possession et la valle di Menam vastata, et in la villa esser alta l'aqua uno passo, unde li habitanti dubitono di deluvio, etc.
     
      Da Ragusi, di Nicolò Gondola, di 23. Replicha quello si havia eri, et haver inteso di la incursion fata a Zara.
     
      Di Candia, di sier Bernardo Zustignan capitano, vice ducha, di 23. Come havia expedito di armar 7 galie nominandole qual, et esser zonto li l'arsil, patron Thomà Negro, con li danari, et havia retenuto nave erano lì; come par in una poliza, la copia di la qual sarà qui soto posta; et havia mandà nave de biscoto a Modom.
     
      In questa matina introno li cai dil consejo di X in collegio novi, zoè sier Beneto da cha da Pexaro, sier Francesco Mocenigo et sier Piero Loredam; et mandati tutti fuora, fo aldito do, mandati in questa terra per il retor di Dulzigno, quali andavano al Turcho over venivano, tra i qual uno secretario di Mantoa.
     
      Et nui savii ai ordeni se redussemo a far li penesi, vano su le galie di Fiandra, justa la leze, zoè do per galia, et balotati molti homeni maritimi ne rimaseno sei.