È da saper, per deliberation dil consejo di X, fu decretà: dimandar a le cinque scuole grande de' batudi 100 homeni per una da mandar in armada, ovvero li danari che sarà ducati 500. Et li executori feno venir a l'armamento tutti li homeni de li trageti et de quelli ne tolevano per mandar su ditte galie.
     
      In questo collegio fo parlato di trovar danari, et poner una decima a le terre di fuora, qual prima per il trentesimo, et alias fo mandato sier Domenego Zorzi qual non potè far nulla; e poi fo dimandato il sussidio caritativo, et contentono pagar in do page zener et fevrer 146; et per questo subsidio trovono 52 milia ducati, siché al presente è bon far cussì.
     
     
      [1499 07 02]A dì 2 lujo. In collegio. Vene sier Andrea Loredan, et acetò provedador a Corphù, el qual va con le presente galie; et ordinatoli vadi con le galie di Fiandra, si parte questa sera; et fatoli comission per collegio sia capo di dette galie fin a Corphù; e menò con lui Marco di Santi per secretario, et Simon di Greci homo marittimo, et alcuni valenti homeni.
     
      Vene el conte Bernardin Fortebrazo condutier nostro, dicendo non haver mal niuno come era ditto, et era pronto di operarsi a li servicii di la Signoria nostra, tamen di la persona è mal conditionato, et ha su la faza quasi el mal de San Lazaro.
     
      [874] Da Roverè, di sier Nicolò da cha da Pexaro podestà, dì 30 zugno. Come il re de' romani non feva altro che dimandar danari, zente e vituarie per il paese, le qual quotodie se mandavano in campo. Et a dì 28, vene uno mandato regio universal a misier Martin da Lodrom, ai conti di Archo, di Tem e di Agresta, che debino triplichar le zente, hanno di mandar in campo per la Dieta fata a Meran terminato.