Da Portogruer, di sier Andrea Zanchani provedador general, di do. Come andava di longo al suo viazo, Zuam Ruosa è secretario con lui.
     
      Da Treviso, di sier Andrea Dandolo podestà, et capitano de stratioti zonto lì. Che quelli do da cha Zorzi, et altri capi vanno in Friul.
     
      Et in questa matina fo balotà do page a le zente d'arme deputate andar in Friul. Qualli sono, sarà notado avanti.
     
      Etiam fo balotà una paga per li stratioti, serveno in levante.
     
      Di Raspo, di sier Daniel da Canal capitano, [884] di 29. Avisa in Bossina esser venuto uno bassà novo per corer in Istria et Friul. Voria munition. Item, manda una lettera dil conte Bernardin di Frangipani, di 27, qual avisa la Signoria di la incursion fata a Zara per turchi. Item, dil zonzer et adunarsi zente lì intorno; poi si duol la Signoria non habi voluto dar al suo messo, mandoe qui, munition. Et per collegio fo comesso a mi Marin Sanudo facesse far la risposta a ditta lettera dil conte Bernardin, et balotà di mandarli barili 10 di polvere di bombarda per adesso; et cussì fici expedir le lettere et tutto.
     
      Di Caodistria, di sier Alvixe da Mula podestà et capitano, di primo, drizata ai cai di X. Dubita di turchi, starà vigilante, voria munition.
     
      Da Liesna, di sier Alvixe Barbarigo conte. Manda l'aventario di le munition sono lì, in execution di la parte.
     
      Da Brandizo, di sier Jacomo Liom governador. Zercha alcuni inconvenienti seguiti, voria darli taja, à retenuto uno.
     
      Da Rimano, di Zorzi Franco secretario. Qual non fu leta. Come mandava de qui alcune artilarie a l'arsenal, etc.