[892] Magnifico Aloisio Molino meo nomine significabis, quod rem, quam mox dicturus sum, in consultatione habeat, matureque rem, ut solitus est, discutiat. Nuper, ducis Charcegi regis olim Panonie filii praefectum comitem Nicolaum Benchovich pleureticum graviter febricitantem, maxima cum gratia curavimus; primo labore partem pecuniarum elargitus sum, partem non sprevimus. Hic apud Charcegum in maxima est existimatione et plura pollicitus est. Gratiam veneti senatus inhians, militum praefectus est; conditiones nomine veneti senatus duci suo Charcego oblaturus est, qui octingentos equos impensa sua alit; si pecunias haberet, etiam plures aleret et incursionibus turcharum se objiceret in territorio suo. Nam et paulo ante, turcharum praedam et captivos ex agro sebenicensi intercepit et liberavit, magnaque gloria cum hostibus certavit. Delectos viros habet, qui incassum stipendium non accipiunt. Hic oram dalmaticam omnem tutari posset, et minori impensa. Tentare conditiones non nocet, si gens et imperio veneto grata est: nil hactenus tentatum, nil dictum est: hoc unum est, quod hujus comitis Nicolaj nuntio fidelissimo rectores nostri de prima turcharum incursione tam subita admoniti sunt. Ex Jadera 1499 die ultimo junii, raptissime.
      Subscriptio. Alexander Benedictus veronensis physicus.
      A tergo. Magnifico et clarissimo domino Aloisio Trivisano, quondam magnifici domini Silvestri domino meo observando. In quodam chyrografo, oratores magnificae comunitatis Traguriensis pro rebus comunibus et pro salute totius Dalmatiae tibi commendo; coram tibi narrabunt, vale.