In questa matina fo parlato di mandar el conte Bernardin in Friul, poi che 'l signor Carlo vol tre paghe, tamen l'impresa di qua obsta, et fo balotà una paga al conte di Pitiano. Item, expedir bombardieri a Durazo e Spalato. Item, expedir il nollo di Ruscho da Liesna per orzi portati qui. Et fono balotati da poi gran disputation, perhò che alcuni zenthilomeni voleano andar patroni di le fuste, ma sier Filippo Trum fu contrario, adeo seguite qualche parola ozi, e tandem a requisition dil principe et nostro hordine contentò fosseno fati popular, et fono electi Alvixe di Tomaso, 19, Bortolo Dere, 18, Piero Polacho, 17 et Zuam Craina, 16.
     
      Item, con li governadori fo balotà il condutor dil dazio dil legname uno fio natural di sier Hironimo Michiel q. sier Anzolo doctor per ducati 6000, qual balotato cazete e iterum fo incantata.
     
      Da poi disnar, fo pregadi. Et prima questa matina fo proposto, per sier Leopoldo Loredam procurator, savio dil consejo, di mandar Nicolò Arduin è col Sagudino, al Turcho con una lettera; et li savii dil collegio, consultato alquanto, pochi sentì questo.
     
      [914] Da Milan, di l'orator, di 9. Come Zuam Vesiga porta le lettere in Franza era zonto a Verzei, zà è in loco securo. Item, doman il ducha si partiva e andava in Alexandria e a Novara, dice vol star in campo contra franzesi, manda a Cremona domino Galeazo di Sanseverino, et harà 100 homeni d'arme di don Alfonxo fiol dil ducha di Ferrara, et à scritto a suo fradelo cardinal Ascanio vengi a governar Milan, qual è a Roma, et il conte di Malz va con lui in campo capo di cavali lizieri, et il signor Alexandro Sforza va capo di la fameja di esso ducha.