Di sier Simon Guoro, provedador di l'armada, di 17, di Andres, apresso Negroponte. Come à inteso per via di Syo, turchi veniva a Napoli con l'exercito terestre; terminà unirsi con cinque galie, zoè sier Antonio da Canal, sier Nicolò Marzelo, sier Nicolò Tajapiera, sier Zuam Batista Polani, et sier Marco Antonio Contarini, et andar a Napoli, et mandar tre galie verso Streto a soraveder l'ussir di l'armata, zoè sier Polo Nani, sier Marco Gusoni, et il Sibinzam. Item, per lettere, à di Syo, come sin 15 zugno l'armata non era ussita, l'esercito va verso Salonichii a la volta di Napoli. Et el ditto scrive, di 20 da Napoli, dil suo zonzer lì con cinque galie, à confortà quelli populi a star di bon animo, non dubita conservar quel luogo et le galie. Da' turchi, voleva il provedador Malipiero fosse andato per escha, non ha voluto andar, et ritorna dal zeneral. Item, esser zonto lì sier Zuam Francesco Baxadona, vien soracomito, stato in Candia, ha conduto 100 arzieri, qualli esso provedador à posti nel castello di Scojo, dove è castelam sier Domenego Corner, come ho scritto di sopra.
     
      Di Candia, dil rezimento, di 10 zugno. Avisano le provision di l'armar fanno de lì; et il zonzer, et expedir fato dil Baxadona di la crida fata de li bandizati; l'armar di le nave retenute per numero 7, et le galie si va armando, zà sono armate numero 8, et mandate al zeneral, scriveno nove vechie hanno.
     
      Da Corphù, dil rezimento, di 29. Come da poi sepulto el Tarsia, quella compagnia restava senza capo, aricorda sia mandato il resto di le munition, et danari per compir le fabriche, qual tutavia fanno lavorar.