Dimanda monition: li soi oratori sono qui. Danna la forteza fata far, qual è beneficio privato et non publico, et saria meglio non la compir. Item, Dimitri Laschari capo di stratioti lì a Traù, scrive, si scusa, etc.
     
      Da Budua, di sier Nicolò Memo podestà. Dubita di turchi, et voria munition, et uno contestabele con qualche fante.
     
      Di Raspo, di sier Daniel da Canal capitano. Come di zorno in zorno aspectava turchi di Bossina coresseno; manda una lettera abuta dal conte Bernardin di Frangipani, l'aviserà quando corerano e li farà noto con trar di bombarde, ma non corerano fin la luna nova; et lui li ha mandà la polvere, barili 10, che la Signoria nostra havia mandato al dito conte Bernardin.
     
      Di Caodistria, di sier Alvixe da Mula, podestà et capitano. Come era cavalchato atorno, et fato provision; et ha ordinà sui monti fuoghi acciò tutti intenda quando turchi corerano: tamen prega la Signoria li mandi monition per fornir molti castelli de lì via, sotto la sua podestaria, come el par in la poliza; à habuto li ducati 80 per pagar li fanti mandà a custodia di Castelnuovo et Montona, sta di bon animo, et non ha paura di turchi.
     
      Da poi disnar fo consejo di X, con zonta di danari. Et vene di Franza lettere di l'orator nostro date a Liom, a dì 8, manda sumarii di nove ebbe il roy de' sguizari da misier Zuam Jacomo Triulzi, et il re esser a Lilla, intrerà el zorno seguente in Liom, dove si facea aparati per honorarlo. Item, fu dal cardinal Roam; li disse monsignor di Lignì non haver acordato ancora le cosse di Bergogna, pur spera adatarà. Item, che monsignor di Nadrages havia pregà il re ajutasse pisani, perché fiorentini li ha tolto Cassina; el re non ha risposo, ma à dimandato a li oratori fiorentini si risolva di esser amici di sua majestà, aliter zonto el sarà a Liom farà retenir lhoro mercadanti.