Vene el principe, et etiam io per esser stato 4 zorni amalato. E poi leto le lettere, referite sier Zuam Badoer doctor, venuto orator di Spagna, fo brieve perché cussì li mandò a dir el principe che fusse, ma succinto disse molte cosse di Spagna. Era stato fuora mexi ... havia speso omnibus computatis ducati ... il re lo fece cavaliere, licet non acceptasse la cavalaria; disse le parole li havia ditto el ducha di Milan; laudò il segretario suo Zuam Soro; et havia lassato ben edifichati quelle alteze con la Signoria nostra. Fo laudato justa il solito dal principe; et per esser di pregadi andò zoso e pochi dì da poi rimase di pregadi.
     
      Fu posto parte, per li savii dil consejo e di terra ferma, di scriver a l'orator nostro a Roma, et averzer al papa la deliberation nostra di la risposta fata a li oratori di Franza, e mandarli la copia, cometendoli che li dichi et lezi solus cum solo, et li dicha soliciti el roy a venir in persona contra Milan, et che volevamo esser tutti dil papa. In conclusion una bona e perfeta lettera per il papa: have solum 6 di no.
     
      Item fu posto, per li ditti savii e nui ai ordeni, atento el bisogno di vender le volte a 8 per 100, zoè [925] si pol vender ancora ducati 2200 d'intrada ha la Signoria di ditte volte, et queste sia nete di decime potendo scuoterle, et quelli le voleno debi in termene di zorni 8 depositar a l'oficio dil sal.
     
      Item, sia vendute le banche di la becharia a raxon di 8 per 100, pur per ditto oficio dil sal; et che quelli harano fato volte dil suo sia stimà el suo lavor e pagadi: e fu presa di tutto el consejo.