Item, che il roy ha mandato monsignor di Sans a' sguizari, e poi el baylo de Degium, qual à gran credito con lhoro, per confortarli a star saldo; et de lì se dice varie nove di ditti sguizari. Item, come passò de lì Piero Zuane da Forlì con uno corier di Milan, va in Franza, si potria a Lion farlo retener et intender, etc. Item, esser venuto lì el fiol dil thesorier chiamato Bosso per far zente di le lanze 50 al Batardo di Savoia col roy, et etiam un altro zenthilomo è venuto per far fanti 1000, da tenir guarda di confini.
     
      Da Riva, di sier Hironimo Baffo, provedador. [928] Come havia dal medico dil conte Andrea di Arco, la pace esser fata tra il re e sguizari, tamen, non si fazea festa siché non dovea esser il vero. Item, havia scrito di una terra tolse alemani a' sguizari, al presente scrive non fu vero, se non che todeschi recuperhò una terra, sguizari prima ge l'havia tolta.
     
      È da saper, ozi partì la nave fo Mema patron Domenego Bianco, portò ducati 3000 al capitano zeneral, se li manda; et fo cargà suso alcuni fanti soto Jacomin di Valtropia, de li qual fè la mostra a Lio sier Zuam Moro savio ai ordeni, et Francesco Duodo, et hessendo li fanti in nave volseno 50 ducati per sovention, e li fo dati.
     
      Da Unigo, dil conte Bernardin Fortebrazo. Scrive è in hordine per cavalchar, voria page tre, perché do sono poche per esser 10 mexi non hanno li soldati auto danari, tamen, avisa li soi homini d'arme sta mejo di altri a honor di la Signoria nostra.
     
      Di Asola, di Zuam Paulo Manfron. Come era in hordine per cavalchar, pur pregava la Signoria li desse danari per li soldati.