Et per collegio fo scritto per le camere: dovesseno dar do page a le zente d'arme, son zercha ducati 8 per homo d'arme per paga, et si fazi la mostra su le stale; zà è stà fata, et si à auto in nota, al presente si farà la mostra armata, et fo ordinato a sier Zorzi Corner el cavalier tal cargo. Item, fo ditto esser morto a Este Piero di Carthagenia, ha cavali 100 con la Signoria nostra, è di più vechii condutieri si habi: non fo vero.
     
      Di Treviso, in risposta di la lettera dil subsidio cristiano. Come quelli citadini, hanno risposto sono poveri, pur vedrà di far, etc. Item, per un'altra lettera dimanda e voria licentia di spender di danari di quella camera, perché il consejo di X non vol li tochi etc.
     
      Di sier Marin Zustignam, podestà et capitano di Ruigo, data a la Bacìa. Come ricevuto nostre lettere, fè el consejo, e dimandò el sussidio cristiano: quelli contadini risposeno esser contentissimi pagar etc.
     
      Da Humago, si have lettere, e altri lochi di l'Istria: vol munition; et in questa matina expedii le munition per Muja, etc.
     
      Da Parenzo, di sier Zusto Guoro, soracomito di una galia grossa. Scrive del suo zonzer lì, et come anderia a trovar el capitano.
     
      In questa matina, fo balotà ducati 1000, per compir di armar la galia Oria, et le caravele 16, con li ducati 4000 per li executori fono compite di armar, e mandate via: zoè vadino per la Dalmatia ad armarsi, poi dal capitano zeneral.
     
      [929] Item, partito el principe et altri savii mii collega, solo restai a balotar, et expedir li capitoli porti per li oratori di Trani, erano soli 15 in collegio, et fono leti, et aldito quello havia consejà sier Piero Marzelo stato provedador lì, et cussì a bossoli e balote a parte a parte fono expediti quasi ad vota.