Da Feltre, di sier Mathio Barbaro podestà et [935] capitano. Come el campo regio era a Slander 15 mia di sora Meran, zoè persone 6000, et quel di sguizari esser persone 15 milia, et che l'episcopo di Brexa nascose la roba sua in uno castello, et cussì feno quelli di Meran et Bolzam. Item, have nova esser a Ispruch oratori dil papa, di Spagna, di Napoli et Milan, quali erano stati da' sguizari per adatar, nulla haveano fato; et che il prender di Cuora per alemani come fu ditto non fu vero; et mandoe una lettera di tal nove, abuta di uno Francesco castelam di Schener, a lui drizata.
     
      Da Udene, dil luogotenente, di 15. Ha nova di certo turchi diano corer in Friul, fata sarà la luna; pertanto si provedi.
     
      Di Caodistria, dil podestà. Come Scander bassà havia fato comandamento tutti chi vol corer a' danni de' cristiani si vengi a far scriver: perhò replica li sia mandato le monition.
     
      Di Piram, di sier Bernardim da cha Tajapiera podestà. Come questa comunità mandava uno messo, qual per haver qualche vituaria maxime polvere per non ne esser ivi nulla.
     
      Veneno sier Domenego Zorzi, sier Hironimo Querini et sier Zacharia Dolfin, quali fono electi per la Signoria ad aldir certa diferentia di alcuni spagnoli, portoe lettere dil re di Spagna in sua racomandation, et alditi disseno haveano raxon, perché sier Bernardo Zigogna capitano di le galie in Barbaria li combatè et li tolse le lanze havia suso la barza, con lettera di fede di uno cardinal non portava a infedeli: per tanto el capitano nostro non le dovea tuor, et conclude hanno gran raxon.