Vene l'orator di Urbim, et disse el signor suo non voria in li capitoli fusse nominà el Carazolo, licet [939] per lettere di man di esso ducha, qual presentoe, si obliga tenirlo con provisiom di ducati 1000 a l'anno fino starà soto la Signoria, e voria fusse ditto in li capitoli la Signoria li dà ducati 12 milia per provision, e non come si dicea, e voria fusse compiaciuto nel ditto numero di 100 homeni d'arme, haver 20 balestrieri, li quali di 100 ha lì cernirà li migliori. Et li fo risposto di tutto erano contenti.
     
      Deposition di Vola Lendari, citadin da Corphù venuto qui a posta. Come era stato alcune zornate da Corphù, e trovò Mustafà bei qual li disse di l'armata, et che Embrai non voleva dicendo: Signor tu hai reputation, tutti ti manda ambasadori, li porà haver qualche senestro; et Carzego, l'altro bassà fo di opinion di venir a Corphù, dicendo: Signor tu bruserà Corphù e sarà signor di tutto el levante; et Jacut terzo bassà non disse nulla. Item, per uno olacho a la Janina, partì 5 zornate di Galipoli, dice a dì 24 l'armata esser partita di velle 100, galie 23, nave a la quara computà 3 galeaze e do nave grosse, el resto da 300 fin 400 bote. Item, caravele et navete fin a la suma de vele 350, computà fuste et schierazi, le galie esser mal in hordine di homeni experti, sono villani et albanesi suso, e qualche fusta di la Natolia ben in hordine et le tre galeaze et 4 nave.
     
      El capitano è il sanzacho di Galipoli, et a Tenedo il capitano dia aprir il mandato dove dovesse andar, qual è per Corphù. Item, el signor Turcho e Chamalì stima molto le galie grosse di la Signoria, e il Signor tien olachi a cao Santa Maura, li avisa quante velle passano di la Signoria.