In questo zorno io fici expedir li oratori di Antivari, di munition.
     
      Da Crema, vene molte lettere di sier Hironimo Liom el cavalier podestà et capitano, di 18. In la prima, in materia dil subsidio cristiano: come proposta nel consejo fono tutti di la parte, et fin hora 22, haveano catà ducati 700; et fu scritto una lettera in risposta per collegio, laudando assai quelli fedelissimi. Item, per un'altra lettera, avisa feva continuar la fabricha di le mure, sarà compite tutte per questo mexe di avosto. Item, per un'altra in risposta, di biave comprerà su quel di Milan, ben voria danari per esser quella camera povera. Item, per un'altra avisa domino Marco da Martinengo era a Orzi, [942] partite con certi cavalli, va a Sonzim poi a Milan; è da saper, à venduto tutte le sue possessiom ha in brexana. Item, per un'altra, avisa l'edito fato per il ducha a Cremona, che niun non porti arma fuora dil teritorio, et questo medemo lui podestà ha fato a Crema, et più che niun non esca di la terra, zoè di la porta senza licentia. Item, per un'altra, zercha misier Anzolo Francesco da Santo Anzolo, qual sarà in hordine per cavalchar, et Lodovico de Vilmerchà over di Sermoni, qual à cavalli 80 li fo dati per collegio.
     
      Et consultato di scriver al capitano di Brexa vadi a Gedi dal conte di Pitiano governator nostro, per consultar in secreto de l'impresa quello li par expediente; et avisarlo zà era stà scritto per le terre che de li danari dil sussidio dovesseno dar do page a tutte nostre zente d'arme, et fo partecipado in qual camera si dovesseno pagar, fato prima la mostra etc. et dar a homo per homo d'arme: le qual page do, montò ducati assai milia.