Vene l'episcopo di Ceneda in materia di certo beneficio di la sua diocesi, si duol etc. Li fo ditto per la Signoria si vol aldir l'altra parte.
     
      Da Padua, di rectori. Come el signor Bortolo d'Alviano era venuto di Roma, et zonto con la moglie a Este, li hanno mandato a dir cavalchi, et lui voria etiam tre page.
     
      In questa matina in collegio fo gran parole et altercation tra sier Filippo Trum et sier Lunardo Loredam procurator, savii dil consejo, adeo el Loredam vene in colera: fo sedate.
     
      Intrò li cai di X, non fo leto altre lettere, et prima fo gran remor per li creditori dil banco di Lipomani. Item, in questa terra era secreto el conte Zuane di Corbavia, vol dar certi castelli soi in Dalmatia a la Signoria nostra, si trata con i cai di X.
     
      Da poi disnar fo pregadi. Et prima noterò alcune lettere.
     
      Da Milan, di l'orator, di 19. Haver inteso eri francesi haveano corso su quel di Alexandria fino su le porte, et preso alcuni balestrieri erano ussiti a la difesa, et che tra todeschi et sguizari sono stati a le man, morti molti di una parte et l'altra. Item, si ha el re di romani ha fato el primogenito dil ducha di Milan, qual prima havia titolo di conte, al presente li dà titolo di principe di Pavia; el signor Galeazo esser andato a Rebecho, et misier Francesco Bernardim Visconte et misier Francesco Triulzi a Sonzin.
     
      Di Crema, di sier Hironimo Lion el cavalier podestà et capitano, di 20. Tre lettere. In la prima haver da un suo amico: come el ducha di Milan sapea la Signoria presto li dia romper per li capitoli à con Franza, et che harà 24 milia fanti, zoè 8000 li darà Milan, 6000 feudatarii, 2000 soi boni che sono ubligati, et 2000 li darà el re Fedrico di Napoli, et 6000 spera haver da' sguizari over alemani.