Item, ha homeni d'arme 1300; harà a queste frontiere in Cremonese homeni d'arme 800, zoè 300 soi, 250 li dà fiorentini, et 250 li dà il re di Napoli, el resto ch'è cento homeni d'arme tra Alexandria et Novara meterà. Item, el cardinal de Sanseverin et il conte di Cajazo, uno starà a Parma l'altro a Piasenza. Item, misier Francesco Bernardin Visconte et misier Francesco Triulzi fo de misier Renato starano a questi confini sora Ojo tra Sonzim, et che 'l [946] Turcho sarà contra la Signoria nostra, et ne darà da far. Item, che domino Marco da Martinengo fuzito da nui havia auto 50 homeni d'arme et 1000 ducati di provision a l'anno dal ducha, et che ditto ducha ha ditto haver da misier Galeazo Visconte che con sguizari si farà la pace, et poi il re di romani romperà a la Signoria. Item, fa asunar biave a 3 forteze, zoè Vegeveno, Mortara et Saltirana; et che de' franzesi veniva do capitani, monsignor di Lignì, et misier Zuam Jacomo di Triulzi; et che il re di Franza non verà in Italia, et si non fusse stà che ditto Triulzi à promesso al re in mexi tre compir l'impresa soa majestà non l'aria tolta. Per l'altra lettera scrive: haver che li stratioti erano fuziti dil ducha, et andati in Aste, tamen non l'ha per via certa; et il ducha à conduto ingegneri fa far bastioni a li confini, et uno di qual havia fato a Pandino; et il conte di Cajazo era stato a Rebecho. Per l'altra lettera esso podestà scrive: esser venuto lì uno maistro vol far salnitrio; et il conte di Cajazo à fato comandamento che tutti li banditi havendo la paxe de li morti, zoè da li parenti, videlicet per homicidio puro, possino ritornar in le lhoro terre etc.