Dil conte Piero di Corbavia scritta al conte di Sibinico, in schiavo, recevuta adì 14 lujo. La qual lettera dice cussì: "Potente signor et amigo, nostro honor. Sapia la Signoria vostra che ancho che [950] domenega havessemo nove de sopra, per le qual havemo de novo che 'l ducha Corvin è stà confirmado nel banadego come son stà confirmadi anche li altri baroni, et che el re ha confirmà la pase con el Signor turcho, et che el ducha Corvin à fato paxe con Cechel Jacomo, et che 'l ge à reso la cità che 'l ge haveva tolta chiamada Borlim con tutto el tesoro che li haveva trovà dentro, oltra quello che s'è speso, et che lui ge deba render le sue doy terre che 'l ge havea dato in pegno, et questo render da un a l'altro dee esser a le fin de avosto, et questo se dia dar i piezi, ma non sapiamo quello che seguirà fino dicto termine, el ducha Corvin s'è a Varasdin l'aspectemo questi zorni, et de' turchi se disse che i vegnirà pur nel contà di Zara: ve avisaremo più spesso con le nostre lettere, ma squasi che nui se maraveliamo che fate tanti presenti a coloro che porta le nostre lettere, et loro sono molto ben remeritadi". Et è sottoscritta conte Piero conte di Corbavia.
     
      Di Arbe, di sier Piero Boldù conte, di tre. Haver auto lettere dil conte Anzolo Frangipani, qual si duol esser stà discoperto dal re di Hungaria per li messi mandò a la Signoria nostra, et esser venuto in odio a soa majestà; et Scander bassà li ha mandato a dir si acorda con lui, unde vol piar partido. Item, haver nova il re di Hungaria, over li baroni fanno certo consejo in una campagna apresso Buda, quello vorano far non lo sa, vederà, etc.