È da saper in la lettera leta di sopra di Caodistria, è che quel podestà aricorda che quelli di Trieste s'intende con turchi, et potriano con barche poner 400 turchi in terra in l'Istria, a Isola over altrove a la marina, pertanto voria la Signoria nostra li mandasse una fusta de lì; et atento sier Ferigo Ferro podestà di Muja s'intese era amalato, fo scritto in Caodistria dovesse mandarli uno citadim lì a governo.
     
      In questo pregadi fo letto la lettera F di debitori di la Signoria nostra; et fu el primo pregadi che sier Antonio Sanudo, ricevuto XL criminal, venisse.
     
      Fu posto, per li savii tutti di collegio, et fo opinion mia, di elezer per scrutinio in pregadi, con pena, uno provedador in Dalmatia, debi partir in termine di tre zorni con persone 7, habi al mexe per spexe ducati 60, et have tutto il consejo, ma non fu fato.
     
      Item, fu messo di condur con la Signoria nostra a stipendio, el conte Xarco con cavalli 100 di stratioti, debi far la mostra a modo stratioti, et questo per conservation di la Dalmatia: ave 21 di no, 154 de sì.
     
      Item, fo posto, per li savii dil consejo et di terra ferma, atento era il tempo di meter il campo in Lombardia, di far 4000 fanti tra sguizari e taliani, et mandar per li spagnoli sono a Roma; et a l'incontro sier Filippo Trum procurator savio di consejo messe di far 2000 sguizari et 2000 provisionati et uno provedador zeneral in campo, zoè tre dì da poi sarà levato il nostro orator di Milan. Item, elezer do solicitadori per collegio a levar le zente d'arme, et condurle in brexana.