Et fo decretà col consejo di X, revochar tutte queste lettere e licentie.
     
      Da Bassan, di sier Alvixe Liom, podestà et capitano, di 22. Avisa prima niun esser passà de lì qual vadi in terra todesca, et questo dice in risposta di quello li fo scritto. Item, haver che sguizari et agnelini erano stà messi di mezo, et esser stà fato di ditti tajata di 1200 da' tedeschi.
     
      Di Ferrara, di sier Hironimo Donado, doctor vice domino nostro, di 22. Come era stato in coloquio col ducha, qual li ha ditto li farà bona compagnia, et è contenti le juridition sue; e poi li parlò in materia di madama Zulia di Ordelaphi per la sua dote, disse: era contento di far etc. Poi steteno in ragionamenti di ste cosse de Italia e turchesche, et esso vice domino li disse: Signor la Signoria vostra è segura e sarà bon fiol di la Signoria, e tanto quanto la vorà l'averà da quella, et il ducha li disse etc. Et par abi mandato a Milan a dir quel ducha fazi quello vol di la Signoria nostra, et li ha risposo non esser speranza, tamen è contento far quanto soa excelentia li scrive, con questo mostri vengi da esso ducha di Ferrara. Item, che 'l ducha de Milan ha mandato per Fracasso, come lui dice, el qual Frachasso manda uno nontio suo a la Signoria per haver la resolution zercha la conduta dimanda. Item, la sententia di Carpi dia far quel ducha, sarà che lui torà Carpi per sé, el qual è più bella terra di Modena, perché a misier Gilberto à dato certi lochi nel cuor dil suo stato, e lui ha dato la sua ragion ha in Carpi, et misier Alberto ch'è lì a Ferrara, cercherà darli qualcossa, sichè haverà quel stado.