In questo pregadi fo messo, per li savii dil consejo et di terra ferma d'acordo, di scriver a l'orator nostro è a Milan, toglij licentia dal ducha e vengi via, et questo si fa a compiacentia di le lettere dil roy, qual sono lete per Gasparo da la Vedoa. Item, di elezer ozi per scrutinio do provedadori in campo, con li modi sono electi provedadori in lo alexandrino, sier Marchio Trivixam e sier Nicolò Foscarini, zoè di ogni oficio ma non continuo, non se li dà tanto al mexe ma le spexe per la Signoria, in pena ducati 100 non possino refudar oltra tutte altre pene. Item, si fazi cavalchar tutte le zente in brexana. Et sier Francesco Capelo el cavalier veniva in pregadi come provedador sora la sanità, andò in renga dicendo si doveva licentiar l'orator di Milan. Di questa matina venendo esso orator di collegio disse a li soldati, axpectavano esser expediti: non ste aspetar [962] che harè pochi danari. Et sier Filippo Trum procurator savio dil consejo solo messe fusse levato e licentiato, etiam, el ditto orator de qui; et andate le parte uno fo non sincera, 8 di no, 71 di quella dil Trum, et di li altri savii 123 e questa fu presa; et fu comandà stretissima credenza la deliberation dil levar di l'orator nostro, et fato le lettere si lievi. Et la caxom non fu preso di licentiar quello di Milan, fo prima si voleva saper che 'l nostro fusse partito: et fu fato el scrutinio con boletini, qual sarà posto qui avanti, et rimase sier Marchio Trivixan et sier Marco Antonio Morexini el cavalier; et chiamati a la Signoria tolseno rispeto fino a la matina di aceptar, et il Morexini volea refudar.