Da Roverè, di sier Nicolò da cha da Pexaro podestà, di 23. Haver nova sguizari haver preso Fraimburg, et tolto la roba, et esser stà gran prede di una parte et l'altra. Item, di ducati 4000 venuti con some di formazo a misier Jorio di Petra Plana a Trento, per far fanti 4000 per il ducha di Milan, qual à uno castello vicino a Feltre. Item, che todeschi volea intrar in l'Agnelina bassa, fono messi di mezo et morti 600, aricorda la terra di Roverè et Castel Barco haver bisogno di provisioni. Poi per un'altra lettera, pur di 23: come a dì 16 le zente regie era [964] stà a le man con sguizari, et esser stà morti de' todeschi 11 milia, et de' sguizari 8000, et questo fu apresso Costanza. Item, el campo regio di Venosa esser quasi disciolto a una villa dil conte di Mazo, et che a uno loco chiamato il Borgeto si facea gran quantità di lanze longe.
     
      Da Brexa, dil capitano, di 23. Esser stà col conte di Pitiano, qual vene lì, ringratia la Signoria nostra di la stima fa di lui et dil governo li vol dar di l'impresa, et esser fidel, et vol acetar libentissime. Aricorda romper in Cremonese, over il conte Filippo de Rossi in Parmesana, et sia capo di fanterie domino Zuam Batista Carazolo qual li piace assai, voria venir secreto in questa terra, et si duol di le parole qualche uno à ditto di lui.
     
      Et fo per collegio scritto al provedador di Roverè, et al provedador di Riva fazino la descrition di le zente dil teritorio per li bisogni pol occorer.
     
      Da Gradisca, di sier Andrea Zanchani, provedador zeneral, di 23. Come era mal in hordine, le zente non venute, si vede disperato.