Item, el ditto secretario à lassà lì alcune lettere che dovesse mandarle a Pexaro, di le qual havea aperte et tolto la copia, et il ducha scrive a quel signor lo vogli ajutar come suo parente, et quello vol far lo avisa. Item, scrive al Gondola a Ragusi ringratiandolo di avisi li ha mandati, etc.
     
      Da Ravena, di sier Alvixe Venier, podestà et capitano, di 24. Come el signor Carlo Malatesta fratello dil signor di Rimano era zonto a Medula, con tre compagni stravestito, qual è stato a Milan.
     
      Da Padoa, di rectori, di 25. Par domino Piero di Carthagenia ha ... cavalli con la Signoria nostra, et è vechio, non vogli andar in campo, ma mandar suo fiol, etiam el Strozi non vol andar, per esser stà ferito et non è varito; sichè la Signoria ordini quello le par.
     
      [967] Fo balotà le page per dar a li fanti ducati 8000. Item, io fici expedir monition per Sibenico, et il resto manchava per Antivari.
     
      Item, fo balotà con li governadori, un'altra volta Bortolo Michiel de sier Hironimo condutor dil dacio dil legname per ducati 6000, et rimase, et fo contra le leze; tamen fu per non dar danno a la Signoria, et balotato li piezi, alcuni cazete, sichè ne darà di altri.
     
      Item, fo expedì li capitoli di li oratori di Otranto, et aldito quello dipose sier Piero Soranzo stato governador lì, et cussì a bossoli et balote fu expedì, et confirmà li ordeni hanno fato li syndici.
     
      Da poi disnar fo pregadi. Non vene il principe, et vene ste lettere.
     
      Da Sibinico, di sier Vetor Bragadin conte et capitano, di 22. Come in quella matina turchi, cavalli 400 in 500 di quelli di Scander, quali di Ostroviza mandò con l'hoste era a demostrar a corer il teritorio, et veneno un quarto di mio propinquo a le porte di la terra, et nostri virilmente ussiteno fuora, adeo ne fo presi 100 di ditti turchi et morti molti, sichè andono via; et si disse Scander tornerà a corer per haver abuto in don la Dalmatia dal Signor; aricorda li sia mandato zente, munition et danari.