Fu posto, per li savii dil consegno et di terra ferma, di scriver a l'orator nostro in Franza la deliberation di levar l'orator nostro di Milan; di la election di do provedadori in campo; di poner le zente a confin; et che debi dir al re, che soa majestà digi a Ferrara, Mantoa et Bologna non dagi ajuto a Milan, et che fiorentini si risolva. Have una non sincera, niuna di no, 167 di sì, et fu presa.
     
      Item, fu posto, per li ditti savii, che li contrabandi del 1489 in qua trovati, la parte aspectante a San Marco sia portà a l'oficio dei provedadori sora la camera d'imprestidi, ai quali sia comesso debbi zerchar de veder et inquerir etc. Have tutto il consejo.
     
      Item, fo posto, per li ditti savii, far 400 in 500 balestrieri a cavallo, sotto quelli capi parerà al collegio a bossoli et balote, et fu presa.
     
      Item, fu posto, per ditti savii, excepto sier Nicolò Foscarini savio dil consejo, di dar 80 cavalli di conduta a Lodovico di Sermoni da Crema, zoè da Vilmerchà, qual have ditto numero in campo a Castel Delze, el qual era prima con el Bentivoy, et sier Nicolò Foscarini contradixe, et disse mal di lui, et sier Marco Antonio Morexini el cavalier, savio dil consejo li rispose laudandolo assai. Poi parlò sier Hironimo Capelo in confirmation di quello havia ditto il Morexini; poi parlò sier Lorenzo di Priuli, fo avogador, lo laudò, ma non è di opinion mandar cremaschi maxime ghibelini a l'impresa di Lombardia. Et mandata la parte have 40 di no, el resto di la parte, et fu presa.
     
      Item, fu posto per sier Marin Lion procurator, sier Filippo Trum procurator, sier Marco Antonio Morexini el cavalier et sier Nicolò Foscarini, savii dil consejo, et io Marin Sanudo savio ai ordeni: che li syndaci nostri sono in Dalmatia, resta uno di lhoro a Zara et in Dalmatia provedador, l'altro vadi a Cataro et sia provedador in Albania, fino verà li provedadori si elezerano, et questo prezudegando al tempo di l'oficio suo, etc.