Vene do oratori di la comunità di Salò: misier Hironimo da Salò, dotor, et ... presentò una lettera di sier Zuliam Gradenigo provedador per tutti li danari per le do limitation dil subsidio cristiano, offrendosi, etc. Fono laudati molto dal principe.
     
      Vene li conti di Porza, castelani in la Patria di Friul, et avisò uno Zuam Febus da Torre capitano di Fiume passò per Pordenon, qual era stato orator per il re Maximiam altre volte al Turcho, et al presente à parlato ai turchi, sichè va, etc.: et avisa turchi esser li confini, dimanda qualche monition di polvere et schiopeti per li soi castelli; et ne fo comesso al nostro hordine la expedition.
     
      Veneno sier Marchio Trivixam et sier Marco Antonio Morexini el cavalier, vanno provedadori in campo, et dimandono li secretarii. El Trivixam volse Zorzi Negro, et il Morexini, Nicolò Aurelio.
     
      Da Roma, di l'orator, di 23. Come havia ricevuto lettere, di 10. Fu dal papa, et comunichò la risposta fata a li oratori francesi col senato, et il papa li piace, ringratia la Signoria, vol excumunichar el signor Lodovico et il cardinal Ascanio, et scriver a li electori di l'imperio, ma vol prima la forma da la Signoria omnino. Item, à concesso le do altre decime al clero libentissime, et questo fo avanti zonzesse la nostra richiesta; et il papa haver ditto la Signoria spende al mexe ducati 250 milia, sichè era su gran spexa, et prega si scriva a Napoli Colonesi non fazi novità, perché soa Santità sta con paura, et sta advertito, non ense di palazo; et l'orator nostro li aricordò facesse fanti et zente, et il papa disse el ducha de Milan è superbo, avaro proditor et pieno di perfidia, tratava di haver Pisa, et hora è nimico de' fiorentini.