Item, li fo ditto l'acordo dei sguizari con il re di romani come si ha per via di Feltre. Risposeno el suo roy sarà prima nominà in la pace, et sguizari verano in suo ajuto; et li fo ditto Antimacho secretario dil marchexe di Mantoa era qui, et non credesseno a sue parole, e cussì Zuam Alberto di la Pigna, per il ducha di Ferrara; et li oratori disseno ditto Antimacho esser stato da lhoro per pregar la Signoria si fidi, et loro oratori li à risposo non haver in comission dal roy di parlar a la Signoria di questo.
     
      Da Feltre di sier Matio Barbaro, podestà et capitano, di 26, eri venuta. Come à inteso sguizari et romani haver fato pace con condition si obligano dar a' servicii dil re di romani sguizari 7000.
     
      Da Riva, di sier Hironimo Baffo provedador, di 25. Haver auto dal capitano di Teni alcune salvadicine per ben convicinar insieme. Item, haver redute le biave in la terra, quale perhò son per tre mexi, à praticato far incanevar. Item, niun porta arme fuori, et ha fato i coradori di piera. Item, el campo dil re di romani esser pur mia 10 di sora Meram pocho numero, zoè 2000 paesani, et forestieri non poleno star.
     
      Da Vicenza, di rectori, di 26. Mandano ducati 600 abuti dil subsidio, il resto sarano longi perché bisogna el contà pagi.
     
      Dil signor Bortolo d'Alviano, da Este. Come anderà in campo, vol li sia fato la mostra, et Hironimo di Galiofi suo messo è di qui.
     
      Da Crema, di sier Hironimo Lion, el cavalier podestà et capitano, do lettere, di 25. Come domino Francesco Bernardin Visconte è a Brignam castelo [974] suo, mia 14 lontan di Crema, et fa homini d'arme, li dà ducati 40, mozi per uno a lire 4 l'uno, et fa balestrieri a cavalo, e li dà ducati 12, mozi; et fanti quanti ne puol trovar lì da soldo; et à publice proclamà chi vol danari vadi da lui, et è andà do cremaschi; et a Caravazo e Mozanega fa tajar i albori come dovesseno aspectar il campo lì. Per l'altra lettera avisa haver fato condur biave in la terra, zà stera 24 milia, licet a dì primo avosto fusse il tempo di condurle, ma lui anticipò zà 12 zorni, et ha fato la descrition di cavali di carete.