Have tutto il consejo.
     
     
      [1499 07 29]Adì 29 Lujo. In collegio. Questa matina fo spazato uno messo a' sguizari, al qual fo dato ducati 25 per veder si se ne potesse haver a soldo nostro; et fo auctor sier Francesco Trum.
     
      Vene l'orator di Ferrara e mostrò una lettera dil signor suo, si scusa non esser andà per stafeta a Milan per esser capitano zeneral dil ducha come fu richiesto, e questo per esser vechio e voler darsi a la pace et a la religione, et che se per niun si havesse a exercitar si esercitaria per la Signoria nostra; et per il principe fo ringratiato del suo bon voler, et feva ben a non si operar, etc.
     
      Veneno li do provedadori, vanno in campo, dicendo eri li fo mandato a donar per monsignor di Beumonte a cadauno uno stocho a la franzese e lo haveano tolto, et fono laudati.
     
      Vene li tre provedadori sopra le exation sier Jeronimo Zorzi el cavalier et compagni, et aricordono certa provision per veder di scuoder.
     
      Da Vicenza, Brexa e Verona in materia di zente d'arme, et Verona zercha le biave, si traze biave dal teritorio.
     
      Da Brexa, di rectori, di 27. Come el conte di Pitiano era venuto lì dicendo: era da fenzer di passar Adda e romper poi in Cremonese etc., la qual lettera acciò fusse secreta fo mandato tutti fuora, et leta solum con sier Marchio Trivixan. Item, mandono una lettera di 26 abuta da Jeronimo da Gavardo el qual lo mandono a Rebecho; li scrive el conte di Cajazo era stato lì, e si bateva le biave per redurle alle forteze, et esser stà fato la mostra a li [977] provisionati a San Daniele e Soresina, et dito conte riman al governo dil cremonese, non ha dato danari ma dice darà, et manda una parte di li provisionati verso Novara e Alexandria.