Item, Fracasso è stà ricolto dal ducha e datoli Piadena ch'è uno castello. Item, el ducha vol prelati richi pagino tutta l'intrada di uno anno. Et a Cremona sono molti gatoli su le caxe, spazano la sera et la matina son piene, non perhò su tutte le caxe ma su molte ch'è segno di peste, come zà fu è anni 80. Item, è discordia tra citadini per certe lite e zà ne son stà morti 5, zoè uno procurator su la piaza, videlicet lì in Cremona; e si dice di brieve la Signoria romperà e si aspeta romper a un tempo con Franza, ma dicono nulla farà venitiani per esser fata la pace tra il re de' romani et sguizzari, e dito re romperà e darà adosso a la Signoria per Valtelina in Valchamonica. Item, per un'altra lettera essi rectori avisano: come passano todeschi a 100 a la bota per Valtelina e va verso Milan perché non si pol obviar, e solum 5 mia passano per creste di montagne; et haveano mandato Jacomo Gavardo inzegner in Valchamonica.
     
      Da Crema, di sier Hironimo Lion el cavalier podestà et capitano, di 27. Haver fato la descrition di homeni, et esser 400 boni balestrieri in quel teritorio de anni 25 fin 30. Item à comprà biave di danari dil sussidio, sichè non ha assà. Et per un'altra lettera avisa esser venuto messi lì a l'hostaria a preparar che dia vegnir lì domino Francesco Triulzi a starvi, et alias fè questo medemo et scampò da Milan.
     
      Da Placidio, di 25. Fo leta una lettera drizata a Gasparo da la Vedoa data a Posclavo. Come era zonto de lì e anderà a Cuora, e fin 6 dì in Aste e fin 8 a Lion; avisa la via seguirà di mandar li corieri, et haver nova da quel podestà esser stà fata a Zurigo una Dieta, et è fata la pace tra il re di romani et sguizari intravegnendo li oratori dil cristianissimo re: la qual lettera fu mandata comunichar a li oratori di Franza acciò intendi esser zonto a salvamento.