Da Riva, di sier Hironimo Baffo provedidor. Come Paulo Albanese contestebele de lì è poltron, serve mal la Signoria nostra. Item, manda in nota quelli ha trato biave dal veronese e portate in terra todesca, la più parte sono zentilhomeni nostri.
     
      Da Feltre di sier Matio Barbaro podestà et capitano, di 27. Come à nova la pace tra sguizari e il re de' romani non esser seguida.
     
      Di Caodistria, dil podestà, di 25. Haver reparà la forteza di Goram, mia tre di sora Castelnuovo, e à posto per castelan uno nepote di Jacomo di Tarsia con 6 compagni, etc.
     
      [978] Da vegia, di sier Piero Malipiero conte, di 25. Haver ricevuto li danari per armar la fusta la qual era compita di armar, et il zorno seguente partiria per Caodistria a trovar il campo.
     
      Da Ragusi, dil Gondola, di 16. Aferma el signor Turcho esser a Pyroto con lo exercito et dito verà a Cataro o a Corphù over altrove. Item, esser morto il bassà fiol fo dil Carzego. Tamen non fu vero. Item, scrisse di 14: come l'armata non era ussita et potria esser la non ussisse per questo anno. È da saper per un'altra via se intese el Signor esser amalato a Philipopuli.
     
      In questa matina fo balotà ducati 100 da dar a quel spagnol qual di jure dia haver come referì sier Domenego Zorzi e sier Hironimo Querini. Item, ducati 400 a sier Marchio Trivixan va provedador in campo per spexe; et sier Domenego Pixani era eleto orator a Milan dete li forzieri a le raxon nuove sichè è compita la sua legation. Item, fo balotà ducati 300 per comprar monition non sono in l'arsenal per mandar in Candia.