Item, aricordo a la magnificentia vostra, che volendo campegiare in Gieradada la illustrissima Signoria, el saria ben fato che 'l se fesse i forni per fare il pane de campo a Martinengo, per esser loco lì in mezo et propinquo a Caravazo et a tutti questi lochi di Gieradada.
     
      Item, aricordo alla magnificentia vostra, che qualche volta vedendosi l'inimico vostro non esser gajardo a potere stare a la campagna a l'oposito vostro, el potria, sicome l'exercito vostro andasse in Gieradada, venire l'exercito inimico in brexana per fare due operationi ad un trato, l'una per removere l'exercito di la Signoria vostra da li danni suoi et farlo venire in brexana, l'altra perché tutti due li exerciti stariano a li danni di le Signorie vostre in brexana, come altre volte fu fatto del 1450 per il ducha Francesco, che vedendosi lui non potere stare a l'oposito vostro con l'exercito passò a l'Abina et vene in brexana a Calvisano, et lì se fortifichò de stechati, et fo necessario a l'exercito di le Signorie vostre, quale era sul milanese ritornare a dietro, et venire de qui in brexana a l'oposito di l'exercito inimico. Et perhò saperia aricordare fidelmente a le Signorie vostre che le facessemo provisione che gente d'arme restasseno in brexana, et maxime a li Orzinovi et a Quinzano, perché le ripe de Olio serieno salve da li Orzinovi insina a Pontevico, et maxime de presente, perché Olio è grosso et non se puole passare senza ponte. Le zente d'arme che fusseno a li Orzinovi et a Quinzano obvieriano che non si facesse parte, et anche l'inimico haveria grandissimo rispeto a volere passare Olio quando se sentisse havere oposito non saria forsi male ordinare che il se fesse le guardie dietro a Olio per li contadini come altre volte fu fato, et de dì et de note.