Et in questo rezeverò gratia de vostra illustrissima Signoria, el cui grando stado guarde et prospere nostro Signor Dio.
      De Sibilia, a dì 24 aprile 1499.
      Subscriptio: Prontissimo a quello che vostra illustrissima Signoria vorrà comandar, io ducha. Et in mezo di la lettera la mansion: Illustrissimo principe et domino domino Augustino Barbadico duci venetiarum etc. La qual lettera, per esser in spagnolo, prima non fu leta.
     
      Da Curzola, di sier Alvixe Balbi conte, di ... lujo. Come mandava de qui el fiol di Jacomo Fichovichy electo soracomito de lì, a tuor la galia; et non vene in tempo, perché zà era stà terminato, visto lettere prima di esso conte, che non si armasse a Curzola.
     
      In quarantia criminal et credo zivil, da poi molti consegii, fo expedì Rufin da la campagna da Verona citadin stato assai mexi in prexon per monopolii et altre cosse di morte seguite in veronese: li tochò il suo collegio sier Piero Duodo come avogador di comun, qual lo menoe, et fu preso di procieder, tamen solum fo confinà per tre anni in questa terra.
     
      Noto. A dì 29 lujo 1499, fono nominati questi [993] coligadi per il cristianissimo re di Franza in la liga fata con la Signoria nostra:
     
      El nostro santo Padre el papa, et la Chiesia romana, l'impero, et li principi lectori di quello.
      Li re di Castilla, de Ingaltera, di Scozia et di Portogallo, di la Marcha, et di Novara.
      L'archiducha di Austria, el Gran maestro et religione di Rhodi.
      El ducha di Savoja, el marchese di Monferà, el signor Constantin come suo tutor et governador.