Le anziane lige et cantoni di Alemagna apelade comunemente sguizari, et quelli di la Grisa.
      Et simelmente i fiorentini.
     
     
      A dì 8 avosto. Fo per la Signoria nostra nominati questi per soi coligadi:
     
      El papa Alexandro, et la santa romana Chiesia.
      El Serenissimo imperio, et li principi electori di l'imperio.
      Il re di Spagna, et regina di Anglia, Hungaria, Polonia, Scocia, Portogallo, Navara, et Dacia.
      Archiducha di Bergogna, cardinal gran maestro di Rhodi, ducha di Savoja, ducha di Pomerania, marchese di Monferà, et signor Constantin.
      Li anziani di la lige, et cantoni alemani elvetii, et liga Grisa. Il ducha di Urbim, la comunità di Ancona, Lucca, signor di Rimano, prefeto conte di Sinigaja, signor di Brenzan, conte di Pitiano governador nostro, signor Carlo Orsini, Bortolo d'Alviano con tutta la caxa et conti di Lodron.
     
      Dil mexe di avosto 1499.
     
     
      [1499 08 01]A dì primo avosto. In collegio non fui perché andai a la villa di Maerne per do zorni; et si mudò tre consejeri, et introno sier Lucha Pixani, sier Antonio Valier e sier Andrea Gabriel; et cai di XL: sier Hironimo Guoro, sier Zuam Duodo et sier Alvixe da cha da Pexaro di sier Fantin.
     
      Fo leto lettere, el sumario sarà notado di sotto; et fo balotato uno scontro dil pagador, va in campo, fono tolti 6 et rimase Segondo Trivixam et fu sotto Josaphat Rizo fradelo di Marco Rizo.
     
      Da poi disnar fo pregadi; e fo messo parte, per li savii dil consejo e di terra ferma, che havendo richiesto el secretario dil conte di Pitiano per nome di esso conte a la Signoria nostra 100 homeni d'arme a suo fiol, è a soldo con senesi et ha homini 40, et a certi soi nepoti, atento la promessa alias li fu fata, che volendo la Signoria nostra el cavalchi, darli 100 homeni d'arme di più, per tanto che li sia dato questi 100 homeni d'arme al ditto suo fiol et nepoti.