[994] Item, provisionati 100 per guarda di la persona di esso conte, e have tutto il consejo.
     
      Fu posto, per sier Luca Zivriam e sier Filippo Trum procurator savio dil consejo, che tutti quelli volevano dar altratanto dil don, era stà tanxato per li X savii, debino esser fati creditori de tutta la quantità, a restituirli poi, et habi il don di ... per 100, et all'incontro el resto de savii messeno che fosse donato solum a la Signoria nostra quella parte saranno tanxati in don. Et parlò in favor di questa opinion sier Nicolò Foscarini savio dil consejo; li rispose sier Filippo Trum procuratore, poi parlò sier Beneto Zustignam savio a terra ferma: e andò le parte 60 dil Zivram consejer e dil Trum savio dil consejo, 130 li altri savii, e questa fu presa.
     
      Fu posto, per li sopraditti savii d'acordo, di mandar a dir per uno secretario a l'orator dil ducha di Milan vadi per tutto domenega via, et have 33 di no 144 di sì, et cussì fu mandato Bernardim di Ambrosii la matina a dirli questa deliberation, el qual orator si preparava dicendo veria a tuor licentia dal principe, et fo ordinato per la Signoria a li avogadori di comun e ai cai dil consejo di X mandasseno li oficiali et barche a zerchar li burchii per li contrabandi.
     
      È da saper, li oratori di Franza provato li 100 ducati se li deva al mexe non bastava per le spexe, mandoe a dir non voleano più danaro da la Signoria e tandem fo adatà la cossa per sier Hironimo Zorzi el cavalier che de intrade per l'oficio di le raxon vechie se li faria far le spexe; et pagerasse l'hostaria a Padoa dove sono li soi cavali.