El sumario di la qual sarà più avanti scritto.
     
      Or lete le ditte lettere et comandato stretissima credenza con sacramento, fo parlato di mandar dicti sumarii a mostrar a li oratori di Franza; et sier Polo Barbo el consejer non volse, et parloe et si alterò con sier Alvixe da Molin savio a terra ferma, et li disse fiameta, et sier Filippo Trum procurator disse a sier Lucha Zivran consejer: vui manze sol a taola, quasi dicat è misero, et sier Lucha Pixani consejer disse: la casa mia è bella et nova, chi non porta non trova.
     
      Vene l'orator di Rimano, et disse zercha quello seguite a San Marino, et si scrivi al ducha de Urbin provedi. Item, voria la Signoria mandasse uno comissario zentilhomo di reputatione lì a Rimano, et voria altri danari per poter cavalchar il signor suo dicendo per lui non mancha. Li fo risposto quanto scriver a Urbim si farà, dil comissario et di danari si vederà etc.
     
      Da Spalato, di sier Marin Moro conte presentai al principe una lettera di 23 lujo. Manda lettere dil bam di Jayza loco de' hungari, la qual li fo portata da doy venuti in hore 48, cossa incredibile in si pocho haver fato tanti mii. L'avisa turchi, di Scopia reduti, dieno venir o in Dalmatia, Cataro, Ragusi o Jayza, vol saper le nove da lui, et che vol ajutar la Signoria nostra, et il re di Hungaria con suo fratello ducha Alberto con 40 milia cavalli esser sora la Sceva, et manda copia di lettere in schiavo traslatada. Item, come Scander bassà va verso Spalato, a dì 22, et passò su quel di Sibinico et Traù, et inteso il trar di bombarde et provisiom fate, et sier Valerio Marzelo soracomito sentì la bombarda, qual quel a hore 22 zonse lì, et lo mandò a Salona per le anime era a la marina.