Li scrive haver fatto comandamento che fin a dì 18 tutti i navilii sono a Corphù vengi a trovarlo, et da lì indriedo non vengino, acciò non si scontri in l'armada dil Turcho, et tal comandamento fece per avanti: hora vol tutti i navilii, è lì, vengino a trovarlo, ma si slargino in mar acciò non si scontri in ditta armada, et che lui con l'armada la seguirà fin la se fermi. Et havia mandato, mo terzo zorno, sier Nicolò da cha da Pexaro, provedador, con tre galie verso Cao Manlio a saper il vero di ditta armada, qual è zonta a Cao Mantello; et che sier Polo Nani soracomito la vete con tempo fosco; infine disse stava di bon animo, et havia grande armada.
     
      Et leto ditte lettere, fo parlato di mandar il Sagudino o Antonio Arduin al Turcho, et altri dicea mandarli prima al zeneral.
     
      Item, la barza Mora era expedicta di armar de li homeni, manchava l'artilaria che non ne era in l'arsenal, et io fici termenar a la Signoria di armar la galia sotil Salomona, justa la parte, atento sier Polo Barbo consejer et altri non la sentiva.
     
      Item, fo balotà ducati 100 a l'orator di Milan, et fu preso, et ducati 100 a sier Alvixe Bon, et alcuni mercadi di l'arsenal.
     
      Da Udene, di sier Domenego Bolani, luogotenente, di primo. Come el sussidio sarà tardo, perhò che li castelani, zoè domino Antonio Savorgnam, domino Bortolo de Nerlis, et un altro stanno lontan. Item, mandoe una relation di Beneto Capelaro explorator, [1006] qual referisse esser stato in Bossina, et turchi 6000 esser partiti per scorer in Dalmatia, li altri sono a Bistuza, numero 12 milia, dicono venirano in Friul; et questo à auto da la duchessa mujer di Zuane Corvino, et dal ducha Doymo, et esser fama in Friul esser persone 10 milia.