Da Padoa, di sier Marco Bolani, et sier Lucha Zen rectori, di 2. Come li juristi haveano electo per suo rector uno domino Stefano, ungaro: vol la confirmation, et fu fata.
     
      Di sier Marchio Trivixan, provedador zeneral, data a Padua, a dì do. Haver che uno Zuam Albanese fo contestabele nostro li à ditto, che hessendo a Asola li disse uno Domenego Graspa stratioto qual stava a Mantoa: el ducha de Milan haver expedito do stratioti, rase le barbe, vanno in Friul per desviar stratioti, portano con sì ducati 9000, uno di li qual à una perla in l'ochio, et porta coperto l'ochio, unde subito di questo fo scritto al Zanchani a Gradischa, et mandatoli la copia di la ditta lettera acciò provedesse.
     
      Da poi disnar, fo pregadi. Et fo subito letto le lettere, chiamato consejo di X, simplice, era capi questo mexe sier Cristofal Moro, sier Pier Balbi et sier Nicolò di Priuli, credo per retenir qualche uno. Et fo poi letto le lettere in pregadi intercepte, et dato sacramento a tutti, per li cai dil consejo di X, etc.
     
      Da Turin, di Zuam Dolze secretario, di 27. Come un certo amico, volea venir a la Signoria, li havea ditto fiorentini a Liom dicevano mal di la Signoria, et che la non havea danari, et havia fatto falir li do banchi per danari doveano essi banchi haver da la Signoria, et che si non fusse il Turcho la Signoria haria fatto liga con Milan et altri contra Franza, et che fiorentini dicono voler rehaver Pisa, et che Milan non si lauda, et che essi fiorentini voriano danar per l'impresa a ricuperar il suo per esser occupà Milan.