Copia di una lettera scritta per Scander bassà
      al ducha Zuam Corvino, translatada, etc.
     
      Da Scander bassà patron di Bossina al magnifico et de ogni gratia da Dio dada: al Signor del paese di Crovatia et de molti altri paexi: al Signor ducha fiol dil q.m re Mathias, in bona sanità et alegreza da Dio possi recever la sua gratia la magnificentia vostra. Acciò che sapia magnificentia vostra come a nui fo comandamento dal nostro Signor Gran turcho che nui se dobiamo presentar nel paexe de la Signoria de Veniexia, et nui se apresentassemo con alcuna moltitudine de homeni, et come intrassemo nel paexe vostro, et cussì drio de nui sono venuti come inimici, et se haveseno posuto anche a nui haveriano preso, et nui questo non havemo dubitado recever da li vostri homeni perché con vui havemo amicitia et bona pace, e specialmente soto el castello de la mojer dil conte Carlo de Lizevas dove fono tolti alcuni de li nostri valenti homeni, et se de lhoro havessemo havuta paura havessemo ben possuto guarentar de lhoro, ma nui se fidavamo de la bona pace. Et da poi che nui la fazemo nel contà de Zara, et cussì Coxule se haveva scoso con sui cavali, et a li nostri ha fato gran impazo, et anche parechi di lhoro ha preso, et da poi che un'altra volta tornassemo soto Ostroviza cussì Coxule mandò da nui un suo homo digando: io ho preso molti de li toi turchi, per tanto io andai soto Ostroviza a zerchar li presoni li quali da li nostri sono piati da vui in bona pace: li quali presoni Coxule non mi volse dar.