Et da poi questo, nui mandassemo alcuni de li nostri valenti homeni perché anche li mostrono a queli dil contà di Zara che li dovesseno scampar, et come fono soto el castello non fezeno altro salvo che ghe menò via alcuni animali; et cussì come nui da la prima fossemo zonti in Bossina più de le volte li nostri homeni a le terre dil nostro Signor sono venuti, à ruinato per le continue incursion. Per tanto se de tutte ste cosse et facende è stato el vostro comandamento et vostra saputa questo non è consueto de bona fede et pace, perché tu sii signor et fiol de signor, et anche nui possiamo trovar 100 et 200 cavali li quali poriano robar et far danno a li vostri [1011] homeni, ma nui tenemo amor et bona pace con vui. Et acciò sapiate se ne cerchate de haver per amici ne haverite, et se ne cerchate per inimici, per inimici ne haverete, et per nui non mancherà se per vui non mancha. Poria ben esser che vui havete inteso el danno è stà fato a vui per avanti da li governadori di Bossina: per tanto tutti queli presoni nui havemo trovato esser vostri, li havemo lassati, et anche più volte haveria mandato da vui el mio homo ma vui siete da lontano, et anche per avanti mandai uno mio homo a Jayza et vui me lo retenesti de questo viazo. Ma se ve piaze esser a parlamento con nui mandate da nui un vostro homo che 'l parla con nui et che 'l porta el vostro messo una lettera de fede aciò che habia a conferir con nui de le nostre fazende. Dio vi feliciti.
     
     
      [1499 08 04]Adì 4 avosto. In collegio.