Item, esso capitano scrive haver da Corom, di 11, come era stà fato comandamento ogni cinque caxe di la Morea parechii uno mozo di orzo et uno mozo di formento e castroni perché dia venir lì uno [1012] bassà e tre flambulari, tamen altra movesta non è stà fata. Item, par siano venuti tre homeni dil Brazo di Mayna a dir a queli rectori di Corom dubita turchi non voglii tuor di lhoro homeni da meter su l'armata, unde più presto si oferiscono a la Signoria nostra, et darano homeni 2000: non ha voluto responderli, ma haveano scrito a lui capitano. Item, ha mandato do brigantini a intender di l'armata turchescha.
     
      Item, manda una lettera di sier Jacomo Zustignan castelan a Cerigo, di 5 lujo, a lui drizata: li avisa haver vista l'armata turchescha velizar tra quella ixola et Negroponte et esser assà velle, non sa dove vadi, dubita di quel loco di Cerigo, et havia dato ducati 25 al gripo portoe questa lettera. Et esso capitano scrive per la Morea haver aviso è stà fato comandamento tutti advertissa et si reduchi a le forteze; et che a la nave di sier Sebastian Marzelo havia pagato homini 112 et dato al patron danari, et ponerà suso altri homeni 60, tamen su le altre nave armate meterà homeni di più per cadauna.
     
      In la lettera di 13. Del ricever di nostre di 23 zugno, di le gajarde provision si facea, et in la materia de' gripi, ma per lettere dil baylo di Corphù non corisponde a la oferta feno; et esser venuti solum do gripi, li altri dice li patroni e il gripo oferiscono a la Signoria, et che quella pagi li homeni etc., et che lui capitano havia dato ducati 75 per uno a li do gripi, et che Corphù li scrive li manderà altri dodici gripi e di la oblation fata per sier Marin Trivixam di sier Marchio dil debitor suo, scrive a Corphù haver retolto ducati 565 de questi, et armi li gripi.