Item, à inteso di li 1000 fanti et formento stera 40000 fo mandati a Corphù, li piace. Item, di le 10 barze, 3 galioni et 4 galie sotil di Franza va a Rhodi, et che zà esso capitano havia scritto al gran maistro li voglii dar la ditta armata, etiam per via di Candia li fo scritto. Item, avisa turchi a bon pato poleno venir come amici e poi far danno come fè a Zara, et che tutta la nostra armata à gran speranza di vincer, maxime inteso le galie grosse vien et le nave. Item, in quella note era venuto sier Domenego Malipiero provedador stato a Lepanto, ha fatto molte provision et à menato tre citadini con lui cavati fuora de lì per bon rispeto.
     
      Di sier Alvixe Marzello capitano di le nave, in porto di Modon, di 13. Avisa star di bon animo, desideroso far, etc.
     
      Di rectori sier Marco Gabriel e sier Antonio Bon, di 13. Come fevano provision, dimandono salnitri e munition.
     
      [1013] Da Napoli di Romania, di sier Simon Guoro provedador di l'armada, data a dì 8. Manda avisi abuti da Syo. Et à mandato sier Nicolò Tajapiera e sier Marco Antonio Contarini con le sue galie a veder il vero di l'armata turchescha, el qual Contarini andò dal capitano zeneral a dirli il tutto, et che lui provedador lì a Napoli non dubita, tien queli stratioti non fazi danno per la Morea e gli ha reduti con le biave dentro la terra, et dice venendo l'armata turcha verso ponente seguirà a trovar il zeneral. Item, esser venuti lì el Grioni et el Sibinzan, erano verso l'Arzipielago con sier Polo Nani, dice haver veligà con l'armata turchescha sora Caresto, et mandoe una lettera di sier Polo Nani di Andres, vechia, li avisava di alcune nove.