Item, che esso re metea 100 homeni d'arme et 500 stratioti paesani in terra di Otranto. Per l'altra lettera di 28, avisa come do galie andò per il cardinal Ascanio, a dì 23 in freta, qual va a Zenoa; et avisa uno liparoto haver auto vista di 17 velle franzesi sora Piombin, in tutto sono numero 26, vano a Rhodi et in ajuto di la Signoria nostra, et di questo il re li parse di novo dicendo: è zorni 15 che monsignor di Taragona à lettere si preparava tal armata e non poteva esser cussì presto ussita; et che il re meteva in hordine le sue zente; et eri partì de lì el conte di Policastro, va orator in Hungaria, e passerà per questa terra. Conclude il re vol esser tutto di la Signoria nostra.
     
      Da Feltre, di sier Mathio Barbaro, podestà et capitano, di do. De li bombardieri li fono mandati esser zonti; et ha nova el campo regio di Venosa esser quasi disciolto, et che il capitano di Primier li havia scritto una bona lettera di la qual mandoe la copia.
     
      Da Ravena, di sier Alvixe Venier, podestà e capitano. Come Pauliza da Cataro, Hironimo Bariselo, et Paulo Basilio contestabeli erano partiti de lì con li fanti, vano in brexana; et che domino Zuam Aldobrandino acetava li 100 cavali lizieri, el qual etiam, lui scrisse a la Signoria esser contento di farli, e si dice è conte.
     
      Da Cataro, di sier Francesco Querini, rector e provedador, di 24 lujo. Haver il Signor turcho a dì 19 era a Filipopuli, e dovea far il suo bayran qual era quel zorno, poi si avieria verso la Valona over Corphù, et el bilarbei di la Grecia esser stà amalato, ma è varito, e Scander bassà è andato sora la Croatia over Dalmatia.